«Liverpul» klubi «Napoli»ga tegishli, ammo o‘tgan mavsumni «Galatasaroy»da ijarada o‘tkazgan 26 yoshli hujumchi Viktor Osimhenni o‘z safiga qo‘shib olish variantini ko‘rib chiqmoqda. Bu haqda "Give Me Sport" nashri xabar bermoqda.

Manba ma’lumotiga ko‘ra, nigeriyalik futbolchining Angliya klubiga o‘tishiga asosiy to‘siq — uning maoshi bo‘lishi mumkin. Hozirda Osimhen haftasiga taxminan 400 ming funt (ya’ni 468 ming yevro) maosh olmoqda. Hozircha forvardni qo‘lga kiritish bo‘yicha favorit klub — «Galatasaroy». Ammo u Yevropaning kuchli klubiga o‘tish maqsadida maoshini qisqartirishga ham rozi bo‘lishi mumkin. Shuningdek, "MYU" klubi ham Osimhenni qo‘lga kiritishni istamoqda.

O‘tgan mavsumda Osimhen barcha musobaqalarda jami 41 ta uchrashuvda ishtirok etib, 37 ta gol va 8 ta golli uzatma bilan ajralib turdi. Uning «Napoli» bilan amaldagi shartnomasi 2026 yil yozigacha mo‘ljallangan.