"Monako"ning o‘ng qanot himoyachisi Vandersonga Yevropaning nomdor klublari qiziqish bildirmoqda. 23 yoshli futbolchi bo‘yicha allaqachon "Barselona", "Manchester Yunayted" va "Tottenxem" klublaridan so‘rovlar kelib tushgan. Jurnalist Valentin Furlani xabariga ko‘ra, "Monako" braziliyalik futbolchi uchun 30 mln yevro narx belgilagan.
Vanderson o‘tgan mavsumda monegaskliklarning 41 ta o‘yinida maydonga tushib, 2 ta gol va 5 ta golli uzatmani o‘z hisobiga yozdirib qo‘ydi. Lateral Braziliya terma jamoasi safida yetti marta o‘ynagan, jumladan, yaqinda Ekvador va Paragvay bilan ikkita o‘yin o‘tkazgan. Transfermarkt portali mutaxassislari futbolchining narxini 20 mln yevroga baholamoqda.
