Bilbaoning "Atletik" klubi rahbariyati Niko Uilyams va "Barselona" vakillari o‘rtasida ehtimoliy muzokaralar bo‘lib o‘tgani haqidagi ma’lumotlar fonida hayratda qolganini bildirdi.
Bu haqda Sport.es nashri yozmoqda. Manbaga ko‘ra, Ispaniya terma jamoasi forvardining agenti Kataloniya klubi sport direktori Deku bilan uchrashuv o‘tkazgan. Shu bilan birga, uning ta’kidlashicha, Barselonaga tashrif shaxsiy xarakterga ega bo‘lib, transfer masalalari bilan emas, balki do‘stlarnikiga safar bilan bog‘liq bo‘lgan.
Mish-mishlarga qaramay, "Atletik"dagilar Uilyamsning klubdagi faoliyatini davom ettirishiga ishonishmoqda. Futbolchining klub bilan 2027 yilning yoziga qadar amaldagi mehnat shartnomasi bor va uning tovon puli 62 million yevroni tashkil etadi.
