"Napoli"ning nigeriyalik forvardi Viktor Osimxen "Galatasaroy"ga doimiy asosda o‘tishi mumkin. Bu haqda jurnalist Florian Plettenberg ma’lum qildi.
Manbaga ko‘ra, "Galatasaroy" so‘nggi uch-to‘rt kun ichida Angliyaning yetakchi klublari yana poygaga qo‘shilganiga qaramay, Viktor Osimxen bilan shartnoma imzolashga optimistik qarashda davom etmoqda.
Ta’kidlanishicha, "Galatasaroy" 26 yoshli Osimxenga yiliga 15-20 million yevro sof maosh taklif qilmoqda. Biroq, eng katta muammo 75 million yevroni tashkil etuvchi tovon puli bo‘yicha to‘lovlar tarkibi bo‘lib qolmoqda.
Osimxen 2024/25 yilgi mavsumni "Galatasaroy"da ijara asosida o‘tkazdi. Uning hisobida 41 o‘yin, 37 gol va 8 golli uzatma bor.
