"Chelsi" bosh murabbiyi Enso Mareska jamoaning yangi hujumchisi Liam Delap haqidagi fikrlari bilan o‘rtoqlashdi.
22 yoshli futbolchi "aristokratlar" safiga iyun oyi boshida "Ipsvich"dan kelib qo‘shilgandi. "Traktorchilar" yulduzining transferi londonliklarga 35,5 mln yevroga tushgan. U jamoada to‘qqizinchi raqamni oldi.
"Liam bu klubda to‘qqizinchi raqam qanchalik muhimligini biladi. U xotirjam, "la’natlangan" raqam bilan hech qanday muammo yo‘q. Biz uzoq vaqtdan beri, "Manchester Siti"dan beri tanishmiz. U biz uchun juda yaxshi variant: Liam biz unga nima bera olishimizni biladi, biz esa u bizga nima bera olishini bilamiz. Umid qilamanki, u gol ko‘p uradi," - deya Mareskaning so‘zlarini keltiradi jurnalist Ben Jeykobs.
