Transfermarkt portali Italiya A Seriyasidagi futbolchilarning transfer qiymatlarini yangiladi. Unga ko‘ra, O‘zbekiston terma jamoasi va Rimning “Roma” klubi hujumchisi Eldor Shomurodov 1 million yevroga qimmatlashib, 5 million yevroga baholanmoqda.

Transfermarkt portali bunga quyidagicha izoh berdi:

"Bu o‘sish asosan murabbiylar shtabining Shomurodovga bo‘lgan ishonchini tiklagani va Eldorning bu imkoniyatdan unumli foydalangani bilan bog‘liq. Shunga qaramay, A Seriyada 29–32 yosh toifasidagi futbolchilar orasida faqat Romelu Lukaku undan yuqoriroq narxga baholangani e’tiborga molik jihat", deyiladi Transfermarkt portalida.

Shomurodov hozirda “Roma”dagi eng qimmat 19-futbolchi hisoblanadi. Shuningdek, u o‘zbekistonlik futbolchilar orasida 3-o‘rinda turibdi. Undan yuqoriroq pog‘onalarda Abduqodir Husanov (35 million yevro) va Abbosbek Fayzullayev (8 million yevro) qayd etilgan.

Ma’lumot uchun, Shomurodov yakunlangan mavsumda “Roma”ning barcha musobaqalar doirasidagi 37 o‘yinida maydonga tushib, 7 ta gol va 5 ta golli uzatmaga mualliflik qilgan. Uning klub bilan shartnomasi 2026 yil iyun oyigacha amal qiladi.