Madridning «Real» jamoasi vingeri Vinisius Junior mashg‘ur ijtimoiy tarmoqdagi sahifasidan klubga tegishli ma’lumotlarni o‘chirib tashladi. Shuningdek, u «Real» futbolkasini kiyib tushgan so‘nggi suratlarini ham sahifasidan yo‘q qildi.
Bu holat, ehtimol, Klublar o‘rtasidagi jahon chempionatidagi ilk o‘yindan keyin unga qarshi kuzatilgan xeyterlik to‘lqini bilan bog‘liq.
Braziliya terma jamoasi hujumchisining oxirgi posti ostida uni jamoani tark etishga chaqiruvchi izohlar ko‘plab uchraydi. Ayrim muxlislar «Al-Hilol»ga qarshi o‘yindagi (1:1) Vinisiusning o‘yinidan norozi bo‘lishgan.
Eslatib o‘tamiz, o‘tgan mavsum yakunlari bo‘yicha Vinisius «Oltin to‘p» uchun ovoz berishda ikkinchi o‘rinni egallagan edi, ammo joriy mavsum yakunida eng ko‘p qiymatini yo‘qotgan futbolchilardan biriga aylandi.













