"Parma" markaziy himoyachisi Jovanni Leoni "Inter"ning himoya chizig‘ini kuchaytirish uchun asosiy nomzodlardan biri bo‘lib turibdi, deb xabar beradi La Gazzetta dello Sport.
Manbaga ko‘ra, milanliklar himoya markazini kuchaytirish uchun 30 million yevro byudjet ajratgan.
Hozirda "Parma" 18 yoshli italiyalik markaziy himoyachini sotishga qiziqmayapti, chunki klubdagilar uning transfer narxi kelasi mavsumda oshishi mumkinligini tushunib turibdi.
Qayd etilishicha, "Inter" Leonini keyingi mavsumni ijara asosida "Parma"da o‘tkazish sharti bilan sotib olish variantini ko‘rib chiqmoqda.
Eslatib o‘tamiz, iyun oyida 2025 yilning fevralidan buyon "Parma"ni boshqarib kelayotgan Kristian Kivu "Inter" bosh murabbiyiga aylangandi.
Avvalroq, "Inter" va "Milan" klublari "Parma" markaziy himoyachisi Leoni uchun kurash olib borayotgani haqida xabarlar tarqalgan edi.
Shu bilan birga, "Inter" 24 yoshli germaniyalik himoyachi Yann Bissekni sotish bo‘yicha 30-40 million yevro atrofidagi takliflarni eshitishga tayyorligi aytilmoqda.
