"Парма" марказий ҳимоячиси Жованни Леони "Интер"нинг ҳимоя чизиғини кучайтириш учун асосий номзодлардан бири бўлиб турибди, деб хабар беради La Gazzetta dello Sport.

Манбага кўра, миланликлар ҳимоя марказини кучайтириш учун 30 миллион евро бюджет ажратган.

Ҳозирда "Парма" 18 ёшли италиялик марказий ҳимоячини сотишга қизиқмаяпти, чунки клубдагилар унинг трансфер нархи келаси мавсумда ошиши мумкинлигини тушуниб турибди.

Қайд этилишича, "Интер" Леонини кейинги мавсумни ижара асосида "Парма"да ўтказиш шарти билан сотиб олиш вариантини кўриб чиқмоқда.

Эслатиб ўтамиз, июнь ойида 2025 йилнинг февралидан буён "Парма"ни бошқариб келаётган Кристиан Киву "Интер" бош мураббийига айланганди.

Аввалроқ, "Интер" ва "Милан" клублари "Парма" марказий ҳимоячиси Леони учун кураш олиб бораётгани ҳақида хабарлар тарқалган эди.

Шу билан бирга, "Интер" 24 ёшли германиялик ҳимоячи Янн Биссекни сотиш бўйича 30-40 миллион евро атрофидаги таклифларни эшитишга тайёрлиги айтилмоқда.