Ukrainaning «Shaxtyor» va «Dinamo» klublarining sobiq murabbiyi, hozirda Ruminiya terma jamoasiga boshchilik qilayotgan Mircha Luchesku 2026 yil yozida ushbu lavozimni tark etishini ma’lum qildi.

AS.ro nashrining xabar berishicha, 79 yoshli mutaxassis yaqinda mamlakat futbol federasiyasi rahbariyati bilan suhbat o‘tkazib, jahon chempionati–2026 saralash natijalaridan qat’i nazar, terma jamoani tark etishga qaror qilganini bildirgan.

Agar Ruminiya jahon chempionatiga yo‘llanma olsa, Luchesku musobaqa yakunigacha jamoa bosh murabbiyi sifatida ishlashda davom etadi. Agar terma jamoa saralashni o‘ta olmasa, u so‘nggi saralash uchrashuvidan so‘ng lavozimini tark etadi.

Bu qarorga asosiy sabab sifatida tajribali mutaxassis o‘z yoshini ko‘rsatmoqda — joriy oyda u 80 yoshga to‘ladi.

Ruminiya terma jamoasi bosh murabbiyligiga Yevro–2024 turniridan keyin Lucheskuning o‘rniga kelgan Edvard Yordanesku qaytishi mumkin. 47 yoshli mutaxassis Yevropa chempionatdan so‘ng jamoani tark etgan, hozirda esa Polsha klubi «Legiya»ni boshqarmoqda. U asosiy nomzod sifatida ko‘rilmoqda.

Eslatib o‘tamiz, Ruminiya JCH–2026 saralash bosqichida shu paytgacha 4 ta o‘yin o‘tkazdi: Bosniya va Gersegovinaga 0:1 hisobida yutqazdi, San-Marinoni 5:1 hisobida mag‘lub etdi, Avstriyaga 1:2 hisobida imkoniyatni boy berdi va Kipr ustidan 2:0 hisobida zafar quchdi. Ayni paytda Luchesku shogirdlari guruhda 3-o‘rinni egallab turibdi.