Kecha — 3 iyul kuni O‘zbekiston kubogining chorak final bosqichiga qur’a tashlandi. Bugun esa Liga avgust oyi taqvimini ishlab chiqdi.

Avvalroq Superliganing barcha turlari juma, shanba va yakshanba kunlariga moslab chiqilgandi. Biroq CAFA musobaqasining navbatdagi bor FIFA kunlarigacha start olayotgani Liganing avgust oyi uchun rejalarini ishdan chiqardi. Ishonamizki, JCH yo‘llanmasini qo‘lga kiritgan mamlakat sifatida bundan keyin Superligaga bo‘lgan hurmat va e’tibor masalasiga jiddiy e’tibor qaratiladi, shuningdek, kelgusi rejalarda FIFA nizomlariga qat’iy amal qilish va barcha masalada professional bo‘lishga erishiladi. Liga bu borada o‘z pozisiyasini Assosiasiyaga bildirdi va albatta CAFA qarorlari Liga tomonidan OFK bilan muhokama qilinadi. 16 klub ishtirok etayotgan musobaqada shu klublar va unda mehnat qilayotganlar rejalari ham inobatga olinishi zarur.

Avgust oyidagi rasmiy uchrashuvlar 29 avgustga qadar davom etishi kerak edi. Endilikda 20-tur 23 avgustda yakuniga yetadi va ayrim klublar II davradagi 20 kunlik faollikdan keyin taxminan shuncha kunlik tanaffusga yo‘l oladi. 25-26 avgust kunlari esa 8 jamoa O‘zbekiston kubogi yarim finali uchun kurashga kirishadi. Taqvim shakllantirishda zarur holatlarda Superliga klublari bosh murabbiylariga aloqaga chiqildi va albatta milliy terma jamoasi ustozi Timur Kapadze bilan rejalar bo‘lishildi.

Endilikda Liga OFK klublar musobaqasiga qur’a tashlaydigan sanani diqqat bilan kuzatib boradi. "Nasaf" va "Andijon" klublari duch keladigan raqiblar va ularga qarshi safar o‘yinlari bizga kuz fasli taqvimini shakllantirishda asos bo‘lib xizmat qiladi.