Bugun Superligala 15-tur doirasida yana ikki o‘yin bo‘lib o‘tadi.

20:00. “Andijon” – “Bunyodkor”

Turning markaziy uchrashuvlaridan biri “Bobur arena”da bo‘lib o‘tadi. Maksim Shaskix jamoasi o‘tgan turda safarda “Xorazm”ni yengib qaytdi. Tabiiyki, kayfiyat yuqori. Bugun ham o‘z maydonida g‘alaba qozonish uchun harakat qiladi.

“Bunyodkor” ham g‘alabalar orqali muxlislarini xursand qilmoqda. "Dinamo" va "So‘g‘diyona"ga qarshi o‘yinda g‘alaba orqali jamoa o‘z holatini yaxshiladi. Endilikda jamoalar “Bobur arena”da jangovar holatda va o‘yin harorati ham yozning qaynoq harorati kabi bo‘lishi katta ehtimol.

20:00. “Mash’al” – OKMK

Asror Aliqulov jamoasi o‘tgan turda Namanganda “Navbahor”dan javobsiz 6 ta gol o‘tkazib yubordi. Ochig‘i, "gazchilar"ning bunday hisobda mag‘lub bo‘lishini hech kim kutmagandi. So‘nggi tur oldidan “Mash’al” futbolchilari qanday holatda ekanligini OKMKga qarshi bellashuvda ko‘ramiz. Aksiga olib Mirjalol Qosimov jamoasi oxirgi paytlarda omadsizlik girdobiga tushib qolgan. Olmaliq futbolchilar gol urishga ham qiynalmoqda. Tushunarliki, bugun "konchilar" g‘alaba ilinjida harakat qiladi. Qisqasi, ushbu o‘yin ikkala jamoa uchun muhim.