Amsterdamning "Ayaks" klubi Moskvaning "Spartak" klubining kosta-rikalik hujumchisi Manfred Ugalde transferiga qiziqish bildirmoqda. Bu haqda niderlandiyalik insayder RutNultien X ijtimoiy tarmog‘ida xabar berdi.
Manbaga ko‘ra, "Ayaks" taxminan 16-17 million yevro to‘lashga tayyor, "qizil-oqlar" rahbariyati esa futbolchining transferini to‘liq qoplash uchun kamida 20 million yevro olish niyatida.
Avvalroq, "Spartak" "Feyenoord"ning forvard bo‘yicha 15 million yevro miqdoridagi birinchi taklifini rad etgani ma’lum bo‘lgandi. Rotterdam klubi kosta-rikalik futbolchini qo‘lga kiritish uchun kurashda hamon favorit hisoblanadi.
2024 yilning yanvar oyidan buyon "qizil-oqlar" safida o‘ynayotgan Ugalde klub safida barcha turnirlarda 52 ta o‘yin o‘tkazib, 19 ta gol va 6 ta golli uzatmani amalga oshirgan. Uning klub bilan amaldagi shartnomasi 2028 yilning yoziga qadar mo‘ljallangan. Transfermarkt ma’lumotlariga ko‘ra, futbolchining bozor narxi 15 million yevroga baholanmoqda.
