Амстердамнинг "Аякс" клуби Москванинг "Спартак" клубининг коста-рикалик ҳужумчиси Манфред Угальде трансферига қизиқиш билдирмоқда. Бу ҳақда нидерландиялик инсайдер RutNultien Х ижтимоий тармоғида хабар берди.
Манбага кўра, "Аякс" тахминан 16-17 миллион евро тўлашга тайёр, "қизил-оқлар" раҳбарияти эса футболчининг трансферини тўлиқ қоплаш учун камида 20 миллион евро олиш ниятида.
Аввалроқ, "Спартак" "Фейеноорд"нинг форвард бўйича 15 миллион евро миқдоридаги биринчи таклифини рад этгани маълум бўлганди. Роттердам клуби коста-рикалик футболчини қўлга киритиш учун курашда ҳамон фаворит ҳисобланади.
2024 йилнинг январь ойидан буён "қизил-оқлар" сафида ўйнаётган Угальде клуб сафида барча турнирларда 52 та ўйин ўтказиб, 19 та гол ва 6 та голли узатмани амалга оширган. Унинг клуб билан амалдаги шартномаси 2028 йилнинг ёзига қадар мўлжалланган. Transfermarkt маълумотларига кўра, футболчининг бозор нархи 15 миллион еврога баҳоланмоқда.
