"Barselona"ning polshalik darvozaboni Voysex Shesni jurnalistlarga o‘z faoliyatida uni eng ko‘p hayratga solgan futbolchi haqida gapirdi. Shesni Goal nashriga Pedrining o‘tgan mavsumda qilgan ishlaridan qoyil qolganini aytdi.
Polshalik darvozabonning aytishicha, ispaniyalik yarim himoyachining hujum va himoyada o‘yinni nazorat qilishini ko‘rish aql bovar qilmaydi.
"Bu menda o‘chmas taassurot qoldirgan futbolchi. Uning daholigi nimada ekanligini bilmayman, lekin u hech qachon to‘pni yo‘qotmaydi", - deya qo‘shimcha qildi Shesni.
Eslatib o‘tamiz, o‘tgan mavsumda Pedri kataloniyaliklar safida Ispaniya chempionatida 37 ta o‘yin o‘tkazib, 4 ta gol va 5 ta golli uzatmani amalga oshirgan.
