"Nottingem Forest" Morgan Gibbs-Uayt tufayli "Tottenxem"ni sudga berishi mumkin.

Kecha "shporlar" yarim himoyachining shartnomasida ko‘rsatilgan 60 mln funt miqdoridagi tovon pulini to‘lashga qaror qilgani xabar qilingandi.

Sky Sports News'ga ma’lum bo‘lishicha, "Nottingem" hozircha Morgan Gibbs-Uaytning "Tottenxem"ga o‘tish imkoniyatini ko‘rib chiqmayapti. Klub londonliklar bilan har qanday aloqani to‘xtatgan va ehtimoliy sud da’volari bo‘yicha o‘z yuristlari bilan maslahatlashmoqda.

"Forest"ning fikricha, "shporlar" futbolchi bilan muloqot qilishga ruxsat olmagan holda unga murojaat qilgan. Shuningdek, "Tottenxem" aynan shu summani taklif qilgani uchun 60 mln funt miqdoridagi tovon puli bo‘yicha maxfiylik buzilgan deb hisoblamoqda.

"O‘rmonchilar" bu transferni to‘liq bloklay olish-olmasligi hozircha noma’lum, ammo u kechiktirilishi kutilmoqda.

Jurnalist Ben Jeykobsning ma’lum qilishicha, klub allaqachon Premyer-ligaga shikoyat qilgan, ular tekshiruv o‘tkazadi. Bundan tashqari, "Tottenxem"dan yarim himoyachi bilan barcha aloqalarni to‘xtatish so‘ralgan xat ham yuborilgan.