"Ноттингем Форест" Морган Гиббс-Уайт туфайли "Тоттенхэм"ни судга бериши мумкин.
Кеча "шпорлар" ярим ҳимоячининг шартномасида кўрсатилган 60 млн фунт миқдоридаги товон пулини тўлашга қарор қилгани хабар қилинганди.
Sky Sports News'га маълум бўлишича, "Ноттингем" ҳозирча Морган Гиббс-Уайтнинг "Тоттенхэм"га ўтиш имкониятини кўриб чиқмаяпти. Клуб лондонликлар билан ҳар қандай алоқани тўхтатган ва эҳтимолий суд даъволари бўйича ўз юристлари билан маслаҳатлашмоқда.
"Форест"нинг фикрича, "шпорлар" футболчи билан мулоқот қилишга рухсат олмаган ҳолда унга мурожаат қилган. Шунингдек, "Тоттенхэм" айнан шу суммани таклиф қилгани учун 60 млн фунт миқдоридаги товон пули бўйича махфийлик бузилган деб ҳисобламоқда.
"Ўрмончилар" бу трансферни тўлиқ блоклай олиш-олмаслиги ҳозирча номаълум, аммо у кечиктирилиши кутилмоқда.
Журналист Бен Жейкобснинг маълум қилишича, клуб аллақачон Премьер-лигага шикоят қилган, улар текширув ўтказади. Бундан ташқари, "Тоттенхэм"дан ярим ҳимоячи билан барча алоқаларни тўхтатиш сўралган хат ҳам юборилган.
