O‘zbekiston terma jamoasi va Moskvaning “SSKA” klubi yarim himoyachisi Abbosbek Fayzullayev Turkiya Superligasi vakili — “Bashakshehir” klubiga o‘tishga juda yaqin. Bu haqda "Perviy Sport" nashri o‘z manbalariga tayanib xabar bermoqda.

Manbaga ko‘ra, Istanbul klubi moskvaliklar bilan faol tarzda muzokara olib bormoqda. “Bashakshehir” Fayzullayev uchun 7,5 million yevro to‘lashga tayyor, kelishuvga esa qo‘shimcha bonuslar ham kiritilishi mumkin. E’tiborlisi, “Bashakshehir” ushbu to‘lovni bir yo‘la, bir martalik to‘lov tarzida amalga oshirishga tayyorligi bildirilgan.

“SSKA” 21 yoshli hujumkor yarim himoyachini 2023 yil Toshkentning “Paxtakor” klubidan atigi 500 ming yevro evaziga sotib olgandi. Uning amaldagi shartnomasi 2026 yil yozida yakuniga yetadi, shuning uchun Moskva klubi uni aynan shu transfer oynasida sotishni rejalashtirmoqda.

Ma’lumot uchun, Fayzullayev o‘tgan mavsum “SSKA” safida 39 ta o‘yinda ishtirok etib, 3 ta gol va 8 ta golli uzatma muallifi bo‘lgan. U Rossiya Premyer Ligasining eng yaxshi yosh futbolchisi sifatida e’tirof etilgan. Transfermarkt portali esa uning qiymatini 8 million yevro deb baholamoqda.