"Real" hujumchisi Rodrigo so‘nggi haftalarda bir qator top-klublar bilan bog‘landi. Bu ro‘yxatda "PSJ" ham bor edi, ammo Liga 1 grandining hujum chizig‘i kuchli futbolchilar bilan to‘ldirilgan. Foot Mercato jurnalisti Xose Kasse Rodrigoning Parij superklubiga bormasligi haqida ma’lumotga ega. Buning sababi oddiy - qiziqishning yo‘qligi.
"Rodrigo "PSJ"ning maqsadi emas," - deb yozdi Kasse ijtimoiy tarmoqda.
24 yoshli Rodrigo "Real"dan ketish haqida o‘ylashi mumkin, chunki u klublar o‘rtasidagi jahon chempionatida kam o‘ynagan. Agar u yangi mavsumda ham ko‘p vaqtini zaxirada o‘tkazadigan bo‘lsa, Rodrigo Braziliya terma jamoasi safida 2026 yilgi jahon chempionatida ishtirok eta olmasligi mumkin.
