Avstraliyaning Sidney shahrida Osiyo Futbol Konfederasiyasi (OFK) ayollar futboli qo‘mitasining navbatdagi yig‘ilishi bo‘lib o‘tdi.
Unda O‘zbekiston futbol assosiasiyasi ayollar futboli bo‘limi boshlig‘i Yuliya Panina ishtirok etdi.
Yig‘ilish davomida ayollar o‘rtasidagi OFK Chempionlar ligasining 2026/27 va 2027/28 yilgi mavsumlari uchun amaldagi chempion jamoaga to‘g‘ridan-to‘g‘ri kvota berish tamoyillari ma’qullandi. Endilikda ushbu nufuzli musobaqaning g‘olibi keyingi mavsumda musobaqaga to‘g‘ridan-to‘g‘ri yo‘llanma oladi.
Agar amaldagi chempion jamoaning tegishli milliy assosiasiyasi turnirda ishtirok etish uchun ariza topshirmasa yoki nomunosib deb topilsa, bu kvota bekor qilinadi va boshqa assosiasiyalarga qayta taqsimlanmaydi. Shuningdek, bir mamlalatning ikki jamoasi guruh bosqichida ishtirok etsa, “bir davlat – bir guruh” tamoyili asosida bir guruhdan o‘rin olmaydi.
Shuningdek, qo‘mita a’zolariga OFK ayollar klublarini lisenziyalash bo‘yicha amalga oshirilayotgan ishlar va taklif etilgan lisenziyalash mezonlari taqdim etildi. Ushbu tashabbus orqali Osiyodagi ayollar klublariga yangi talablar va professional standartlarga moslashish uchun yetarli vaqt berilishi, shu bilan birga ayollar klublari futbolining raqobatbardosh kelajagini ta’minlash maqsad qilingan.
Bundan tashqari, 2027 va 2028 yillarda o‘tkaziladigan U-17 qizlar o‘rtasidagi Osiyo kubogi musobaqalarining reglamentlari tasdiqlandi hamda 2024-yil noyabr oyida o‘tgan avvalgi majlisdan buyon ayollar futboli yo‘nalishidagi musobaqalar, hakamlik va texnik rivojlanish bo‘yicha yangilanishlar taqdim etildi.
