Австралиянинг Сидней шаҳрида Осиё Футбол Конфедерацияси (ОФК) аёллар футболи қўмитасининг навбатдаги йиғилиши бўлиб ўтди.

Унда Ўзбекистон футбол ассоциацияси аёллар футболи бўлими бошлиғи Юлия Панина иштирок этди.

Йиғилиш давомида аёллар ўртасидаги ОФК Чемпионлар лигасининг 2026/27 ва 2027/28 йилги мавсумлари учун амалдаги чемпион жамоага тўғридан-тўғри квота бериш тамойиллари маъқулланди. Эндиликда ушбу нуфузли мусобақанинг ғолиби кейинги мавсумда мусобақага тўғридан-тўғри йўлланма олади.

Агар амалдаги чемпион жамоанинг тегишли миллий ассоциацияси турнирда иштирок этиш учун ариза топширмаса ёки номуносиб деб топилса, бу квота бекор қилинади ва бошқа ассоциацияларга қайта тақсимланмайди. Шунингдек, бир мамлалатнинг икки жамоаси гуруҳ босқичида иштирок этса, “бир давлат – бир гуруҳ” тамойили асосида бир гуруҳдан ўрин олмайди.

Шунингдек, қўмита аъзоларига ОФК аёллар клубларини лицензиялаш бўйича амалга оширилаётган ишлар ва таклиф этилган лицензиялаш мезонлари тақдим этилди. Ушбу ташаббус орқали Осиёдаги аёллар клубларига янги талаблар ва профессионал стандартларга мослашиш учун етарли вақт берилиши, шу билан бирга аёллар клублари футболининг рақобатбардош келажагини таъминлаш мақсад қилинган.

Бундан ташқари, 2027 ва 2028 йилларда ўтказиладиган U-17 қизлар ўртасидаги Осиё кубоги мусобақаларининг регламентлари тасдиқланди ҳамда 2024-йил ноябрь ойида ўтган аввалги мажлисдан буён аёллар футболи йўналишидаги мусобақалар, ҳакамлик ва техник ривожланиш бўйича янгиланишлар тақдим этилди.