Hujumkor yarim himoyachi Abbosbek Fayzullayev SSKAdan Istanbulning "Bashakshehir" klublariga ko‘chib o‘tdi. Turkiya Superliga klubi 21 yoshli o‘zbekistonlik futbolchining o‘z safiga o‘tganini rasman e’lon qildi. Fayzullayev besh mavsumga mo‘ljallangan mehnat shartnomasini imzoladi.
"Biz Fayzullayevni oilamizga kelib qo‘shilgani bilan qutlaymiz va unga to‘q sariq va to‘q ko‘k rangli libosda muvaffaqiyatlar tilaymiz", - deyiladi klub xabarida.
SSKAda ikki mavsum davomida Abbosbek Fayzullayev 72 ta rasmiy o‘yinda maydonga tushib, 8 ta gol urdi va jamoadoshlariga 22 ta golli uzatmani amalga oshirdi. Endi Abbosbek Turkiyada o‘zini yaxshi ko‘rsatishga harakat qiladi.
