"Paxtakor" jamoasi bilan shartnoma imzolagan Zaid Tahsinning faoliyatiga nazar tashlaymiz.
Yozgi transferlar oynasida asosiy himoyachilaridan biri Abdulla Abdullayevdan ayrilgan "Paxtakor" uning o‘rnini to‘ldirish va himoyadagi raqobatni oshirish maqsadida iroqlik futbolchi Zaid Tahsin bilan kelishuvga erishdi.
Zaid futboldagi professional faoliyatini 2019 yil "Naft Al Vassat" klubida boshlagan. 2021 yil futbolchi Iroqning mashhur jamoalaridan biri "Al Talaba"ga ko‘chib o‘tdi. 2023 yilning aprel oyida Zaid ushbu jamoadagi ishonchli o‘yinlari sabab Iroq Yulduzlar ligasida oyning eng yaxshi futbolchisi deb topilgan. 2024 yil futbolchi o‘z mamlakatining baydoqdor klubi — "Eyr Fors"ga ko‘chib o‘tadi va shu vaqtga qadar ushbu klubda to‘p tepdi.
U 2022 yilning 26 sentyabr sanasida Iroq terma jamoasi tarkibida o‘z debyutini o‘tkazadi. Tahsin hozirgacha Iroq termasi safida 19 ta o‘yinda maydonga tushishga ulgurdi. U faoliyati davomida Iroq U23 terma jamoasi bilan G‘arbiy Osiyo chempionatida va Iroq termasi bilan Ko‘rfaz kubogi musobaqasida chempion bo‘ldi.
Ushbu futbolchi haqidagi qisqa ma’lumotlar bilan tanishing :
Tug‘ilgan sanasi - 2001 yil 29 yanvar
Tug‘ilgan joyi - Iroq, Najaf
Yoshi - 24
Bo‘yi - 1.93 sm
O‘YNAGAN JAMOALARI
Naft Al Vassat - 31 o‘yin, 1 gol
Al-Talaba - 92 o‘yin, 13 gol
Eyr Fors - 30 o‘yin, 2 gol
