Xabi Alonso "Real"ga yana transferlar kerak, deb hisoblamoqda.
Bu yozda madridliklar safini himoyachilar Trent Aleksandr-Arnold, Alvaro Karreras va Din Xyoysen, shuningdek, vinger Franko Mastantuono to‘ldirdi.
Biroq, "Real" bosh murabbiyi hali tarkibni yaxshilash kerak deb hisoblamoqda. Alonso va uning shtabi ikki nafar yangi o‘yinchi sotib olishni istamoqda. Agardan Rodrigo jamoadan ketsa, ulardan biri aynan braziliyalik vinger o‘rniga sotib olinadi.
Ayni paytda "Real" bozorda qandaydir yangi variantlarni ko‘rib chiqayotgani haqida ma’lumot yo‘q.
Yaqinda klub bilan aloqaga chiqqan manbalarning ta’kidlashicha, madridliklar yarim himoya chizig‘ini kuchaytirish variantlariga e’tibor qaratgan, biroq nomzodlarning hech biri rahbariyatda to‘liq ishonch uyg‘ota olmagan. Shu bilan birga, klubdagi manbalar yangi xaridlarni kutish kerak emasligini va Alonso mavjud futbolchilarga moslashishi kerakligini ta’kidlamoqda.
