2026 yilda bo‘lib o‘tadigan “Barselona” prezidentlik saylovlarida amaldagi rahbar Joan Laporta yana ishtirok etadi. Agar u qayta saylansa, klubni top darajadagi futbolchilar bilan kuchaytirishga va’da bermoqda. Bu haqda Fihajes nashri xabar berdi.

Manbaga ko‘ra, Laporta saylovoldi strategiyasi doirasida “ko‘k-anorranglilar”ni yana yuqori darajaga olib chiqishni maqsad qilgan. Agar u prezidentlikka qayta tayinlansa, jamoaga Erling Holand, Xulian Alvares va Bredli Barkolya kabi futbolchilarni olib kelishni rejalashtirgan.

Laportaning asosiy nishoni — “Manchester Siti” hujumchisi Erling Holand. Bu transfer taxminan 120 million yevro evaziga amalga oshishi mumkin. Garchi hozirgi moliyaviy sharoit bunga imkon bermasa-da, Laporta 2026 yilgacha klub iqtisodiy ahvoli yaxshilanishiga ishonmoqda.

Shuningdek, “Barselona” uzoq vaqtdan beri argentinalik hujumchi Xulian Alvaresga qiziqib keladi. Endilikda Laporta argentinalik futbolchini “Atletiko Madrid”dan sotib olishga harakat qilmoqda. Biroq transferning amalga oshishi qiyin kechishi mumkin: “matraschilar” futbolchi uchun 100 million yevro talab qilmoqda.

Ro‘yxatdagi yana bir nom bor — “PSJ” futbolchisi Bredli Barkolya. Fransiyalik yosh iqtidor “PSJ” tarkibida muntazam o‘yin amaliyotiga ega emas. Shu sababli bu transfer nisbatan osonroq amalga oshishi mumkinligi taxmin qilinmoqda. Parij klubi Barkolyaga 80–100 million yevro atrofida narx belgilagan.

Ma’lumot uchun, Joan Laporta 2003–2008 yillar davomida “Barselona” prezidenti bo‘lgan. U 2021 yilda ikkinchi marta ushbu lavozimga saylangan. Uning rahbarligi davrida klub moliyaviy muammolardan chiqishga harakat qilmoqda. Xususan, “Kamp Nou” stadionini rekonstruksiya qilish loyihasi aynan Laporta tashabbusi bilan boshlangan.