«Chelsi» klubi akademiyasi tarbiyalanuvchilarining sotuvidan uch yil ichida 250 million funtdan ortiq daromad topdi.

BBC nashrining xabar berishicha, ushbu yozning o‘zida barcha futbolchilar sotuvidan 225,5 million funt sterling daromad olingan. Bundan tashqari, Noni Madueke, Jorje Petrovich va boshqa o‘yinchilarning transferlari «ko‘klar»ning sof foydasini oshirgan. Klub bu yozda daromad 300 million funtdan oshishiga umid qilmoqda.

Akademiya o‘yinchilari klub hisobotlarida «sof foyda» hisoblanganligi sababli, ularning transferlari «Chelsi»ga ko‘proq moliyaviy moslashuvchanlikni ta’minladi va 250 million funtlik yangi xaridlarni moliyalashtirishga yordam berdi. Shu bilan birga, transfer xarajatlari uzoq muddatli shartnomalar bo‘yicha besh yillik muddatga amortizasiya qilinadi.

Akademiyaning asosiy tarbiyalanuvchilari, jumladan, Meyson Maunt («Manchester Yunayted»ga 55 million funtga), Ian Maatsen («Aston Villa»ga 37,5 million funtga), Konor Gallager («Atletiko»ga 34 million funtga) va Lyuis Xoll («Nyukasl»ga 28 million funtga) kabilarni sotish «Chelsi»ning moliyaviy qoidalarga rioya qilishida hal qiluvchi rol o‘ynadi.

Oxirgi uch mavsumda klub akademiyadan o‘tgan futbolchilarni sotishdan jami 251,2 million funt sterling daromad oldi. Bu summa yangi o‘yinchilarga qilingan 1,25 milliard funtlik xarajatlarning bir qismini qoplagan.

Biroq, hatto bu ham «Chelsi»ning moliyaviy qoidalarga rioya etishi uchun yetarli bo‘lmadi, shuning uchun klub ikki mehmonxona va ayollar jamoasini umumiy qiymati 276,6 million funtga sotishga majbur bo‘ldi. Eslatib o‘tamiz, bu bitimlar APL tomonidan ma’qullangan, ammo UYEFAning moliyaviy qoidalari bilan rad etilgan. Natijada «Chelsi» 26,7 million funt sterling miqdorida jarimaga tortilgan.