«Челси» клуби академияси тарбияланувчиларининг сотувидан уч йил ичида 250 миллион фунтдан ортиқ даромад топди.

BBC нашрининг хабар беришича, ушбу ёзнинг ўзида барча футболчилар сотувидан 225,5 миллион фунт стерлинг даромад олинган. Бундан ташқари, Нони Мадуэке, Жорже Петрович ва бошқа ўйинчиларнинг трансферлари «кўклар»нинг соф фойдасини оширган. Клуб бу ёзда даромад 300 миллион фунтдан ошишига умид қилмоқда.

Академия ўйинчилари клуб ҳисоботларида «соф фойда» ҳисобланганлиги сабабли, уларнинг трансферлари «Челси»га кўпроқ молиявий мослашувчанликни таъминлади ва 250 миллион фунтлик янги харидларни молиялаштиришга ёрдам берди. Шу билан бирга, трансфер харажатлари узоқ муддатли шартномалар бўйича беш йиллик муддатга амортизация қилинади.

Академиянинг асосий тарбияланувчилари, жумладан, Мейсон Маунт («Манчестер Юнайтед»га 55 миллион фунтга), Иан Маатсен («Астон Вилла»га 37,5 миллион фунтга), Конор Галлагер («Атлетико»га 34 миллион фунтга) ва Люис Холл («Ньюкасл»га 28 миллион фунтга) кабиларни сотиш «Челси»нинг молиявий қоидаларга риоя қилишида ҳал қилувчи рол ўйнади.

Охирги уч мавсумда клуб академиядан ўтган футболчиларни сотишдан жами 251,2 миллион фунт стерлинг даромад олди. Бу сумма янги ўйинчиларга қилинган 1,25 миллиард фунтлик харажатларнинг бир қисмини қоплаган.

Бироқ, ҳатто бу ҳам «Челси»нинг молиявий қоидаларга риоя этиши учун етарли бўлмади, шунинг учун клуб икки меҳмонхона ва аёллар жамоасини умумий қиймати 276,6 миллион фунтга сотишга мажбур бўлди. Эслатиб ўтамиз, бу битимлар АПЛ томонидан маъқулланган, аммо УЕФАнинг молиявий қоидалари билан рад этилган. Натижада «Челси» 26,7 миллион фунт стерлинг миқдорида жаримага тортилган.