«Manchester Yunayted» hujumchisi Rasmus Hoylundga kelasi mavsumda o‘yin amaliyotiga ega bo‘lishni istasa, «qizil iblislar» safini tark etishi zarurligi haqida ma’lumot berildi. Bu haqda jurnalist Ben Jeykobs o‘zining X ijtimoiy tarmog‘ida xabar berdi.

Manba ma’lumotiga ko‘ra, mankunianliklar 22 yoshli forvardni sotishni afzal ko‘rishmoqda, ammo uni ijaraga berish variantini ham istisno qilishmayapti. Daniyalik futbolchiga «Milan» qiziqish bildirgan va ijara hamda keyinchalik sotib olish imkoniyatini o‘z ichiga olgan shartnoma uchun 40 mln funt (46,4 mln yevro) taklif qilishga tayyor.

Hoylund 2023 yil yozidan beri «Manchester Yunayted» safida to‘p surmoqda. Shu vaqt ichida u barcha musobaqalarda 95 o‘yinda maydonga tushib, 26 ta gol urib va 6 ta golli uzatma bergan. Uning klub bilan amaldagi shartnomasi 2028 yil yozigacha mo‘ljallangan. Transfermarkt portali ma’lumotiga ko‘ra, futbolchining bozor qiymati 35 mln yevro.