Yozgi transfer oynasining so‘nggi haftalarida “Barselona” yarim himoyachi Dani Olmo bilan xayrlashishga tayyor ekani haqida xabarlar tarqaldi. Fichajes nashrining yozishicha, kataloniyaliklar Angliya Premyer Ligasi va Saudiya Arabistoni Pro Ligasidan tushadigan takliflarni ko‘rib chiqishga tayyor.

Unga ko‘ra, rahbariyat futbolchining tez-tez jarohat olishi, shuningdek, Fermin Lopesning yorqin o‘yini ortidan bunday qarorga kelgan. Shuningdek, “Barselona” ustozi Hansi Flik Rafinyani aynan Olmo to‘p suradigan pozisiyada sinab ko‘rishni rejalashtirmoqda. Chap qanotni esa Markus Rashford orqali kuchaytirishni maqsad qilgan. Gavi ham 4-2-3-1 sxemasida “yashirin o‘nlik” rolida o‘ynay oladi. Bularning barchasi Dani Olmoning “Barselona”da ketish ehtimolini oshiradi.

“Ko‘k anorranglilar” yozgi transfer oynasida katta miqdorda daromad olishni, shu orqali yangi futbolchilarni La Ligaga ro‘yxatdan o‘tkazish hamda moliyaviy muvozanatni tiklashni rejalashtirmoqda. Shu sababli klub Dani Olmoni taxminan 60 million yevro evaziga sotib yuborishi mumkin.

Manbaga ko‘ra, ispaniyalik yarim himoyachi uchun Londonning “Tottenhem” klubi asosiy da’vogar bo‘lib turibdi. Bundan tashqari, Saudiya Arabistonining bir nechta klublari ham Olmo uchun katta miqdorda taklif tayyorlamoqda.

Dani Olmo o‘tgan mavsum “Barselona” safida jami 39 uchrashuvda maydonga tushib, 12 ta gol va 7 ta assist muallifiga aylangan. Futbolchining klub bilan amaldagi shartnomasi 2030 yil yozigacha mo‘ljallangan.