UFC afsonasi Xabib Nurmagomedov promoushen prezidenti Dana Uaytning uning hozirgi vazni va oktagonga qaytishi mumkinligi haqidagi bayonotiga munosabat bildirdi.

Avvalroq Dana Uayt Xabibning qaytish ehtimolini inkor etib, shunday degan edi:

«O‘ylashimcha, biz hozir uni ortga qaytara olmaymiz. Buning ustiga, uning vazni hozir 100 kilogramm yoki undan ham ko‘proq chiqsa kerak. U yaxshi hayot kechirmoqda, qaytadan jang qilishni xohlaydi deb o‘ylamayman».

Xabib Nurmagomedov ijtimoiy tarmoqdagi sahifasida bunga qisqa qilib javob qaytardi:

«Men 93 kilogrammman, Dana», — deb yozdi u.

Eslatib o‘tamiz, Xabib Nurmagomedov MMAda 29 ta jang o‘tkazib, ularning barchasida g‘alaba qozongan (29-0). U 2020 yilda yengil vazn toifasida UFC chempioni maqomida faoliyatini yakunlagan edi.