17 avgust tongida AQSHning Illinoys shtati, Chikago shahrida o‘tkazilishi rejalashtirilgan UFC 319 turnirida oktagonga chiqishi kerak bo‘lgan o‘zbekistonlik jangchi Nursulton Ro‘ziboyev va amerikalik Brayan Battl o‘rtasidagi bahs bekor qilindi. Bu haqda liga matbuot xizmati xabar berdi.

Sabab sifatida Brayan Battl belgilangan vazn me’yorlarini bajara olmagani ko‘rsatildi. AQSH vakili 86,1 kg tosh bosdi. Bu belgilangan me’yordan salkam 2 kg ko‘proqdir. Shu bois UFC mazkur jangni bekor qilishga qaror qildi.

Shundan keyin sportchilar uchrashib, o‘zaro suhbatlashib oldi. Brayan Nursulton bilan suhbatda jangdan oldin o‘tkazilgan matbuot anjumanida o‘zbekistonlik muxlislar haqida aytgan gaplari uchun uzr so‘radi. Ro‘ziboyev esa oktyabr oyida Abu-Dabida o‘tadigan UFC oqshomiga jang qilishni taklif qildi.

Ma’lumot uchun, Nursulton Ro‘ziboyev 2014 yildan beri professional MMA jangchisi sifatida faoliyat yuritib keladi. U 2023 yilda UFC promoushinida debyut qilgan. U hozirga qadar faoliyati davomida 47 ta jang o‘tkazib, ulardan 36 tasida g‘alaba qozongan, 9 marta mag‘lub bo‘lgan va 2 marta durang qayd etgan. Brayan Battlga qarshi bahs Ro‘ziboyevning UFC’dagi oltinchi jangiga aylanishi mumkin edi. Bungacha u ushbu promoushenda 5 marotaba oktagonga ko‘tarilib, 4 ta g‘alaba va 1 ta mag‘lubiyat qayd etgan.