"Manchester Yunayted" yozgi transferlar oynasidagi xarajatlardan keyin byudjetni muvozanatga keltirish uchun bir necha futbolchisini sotishga majbur bo‘lmoqda. Football Insider xabariga ko‘ra, mankunianliklar safida yaqin orada jamoani tark etmaydigan futbolchi bor.

Manbaga ko‘ra, "Manchester Yunayted" markaziy himoyachi Xarri Maguayrni sotmoqchi emas. Uning o‘yinidan "qizil iblislar" ustozi Ruben Amorim to‘liq qoniqish hosil qilgan. Qolaversa, mankunianliklar transfer oynasining qolgan qismida himoyachi sotib olishni rejalashtirmayapti.

Yozda ingliz klubi Maguayr transferi bo‘yicha bir nechta takliflarni rad etdi.

O‘tgan mavsumda 32 yoshli himoyachi barcha musobaqalarda 40 ta o‘yinda maydonga tushib, 4 ta gol urgan va 1 ta golga hammualliflik qilgan. Bir yildan so‘ng uning klub bilan shartnomasi yakunlanadi.