"Bavariya" hujumchisi Xarri Keyn yangi mavsumni navbatdagi xet-trik bilan boshladi.

Angliyalik futbolchi Germaniya chempionatining 1-turida "RB Leypsig"ni mag‘lub etishga yordam berdi - 6:0. 32 yoshli hujumchi 64, 74 va 78-daqiqalarda raqib darvozasini ishg‘ol qildi - u myunxenliklarning so‘nggi uchta goliga mualliflik qildi. Squawka xabariga ko‘ra, Keyn Bundesligada sakkizta xet-trik qayd etgan - u "Tottenxem" safida Angliya Premyer-ligasida ham shuncha xet-trikka erishgan.

Xarri Bundesligada 64 ta o‘yinda 65 ta gol urgan bo‘lsa, APLda 320 ta o‘yinda 213 ta gol urgan.

"Bavariya" hujum chizig‘i yetakchisi o‘tgan ikki mavsumda Germaniya chempionatining eng yaxshi to‘purari bo‘lgandi.