23 avgustdan 24 avgustga o‘tar kechasi MLS doirasida «Di-Si Yunayted» — «Inter Mayami» uchrashuvi bo‘lib o‘tdi. O‘yin AQSH poytaxti Vashingtondagi «Audi Fild» stadionida o‘tkazilib, 1:1 hisobida durang bilan yakunlandi.

13-daqiqada mezbonlar hisobni ochishdi — amerikalik yarimhimoyachi Jekson Xopkins o‘z jamoasini oldinga olib chiqdi. Unga finlyandiyalik xavbek Matti Peltola yordam berdi. Ikkinchi bo‘limda argentinalik hujumchi Baltasar Rodriges yangi futbolchi Rodrigo De Paul uzatmasidan keyin hisobni tenglashtirdi.

Ushbu bahsda yulduzli duet — Lionel Messi va Jordi Alba maydonga tushmadi. Shuningdek, o‘yinni zaxiradan boshlagan Luis Suares va Serxio Buskets ham gol yoki assist bilan ajralib turishmadi.

Keyingi turda «Inter Mayami» o‘z maydonida «Chikago Fayr»ni qabul qiladi, «Di-Si Yunayted» esa safarda «Nyu-York Siti»ga qarshi o‘ynaydi. Har ikkala bahs 31 avgust kuni bo‘lib o‘tadi.

E’tiborlisi, «Di-Si Yunayted» MLSda 11 ta o‘yindan buyon g‘alaba qozona olmayapti va Sharqiy konferensiyada 21 ochko bilan oxirgi — 15-o‘rinda bormoqda. «Inter Mayami» esa 46 ochko bilan 5-pog‘onada joylashgan.

MLS — Major League Soccer
Di-Si Yunayted (Vashington) — Inter Mayami (Mayami) — 1:1
Gollar: 1:0 — Xopkins (13’, Peltola), 1:1 — Rodriges (64’, De Paul).