“An-Nassr” klubi va Portugaliya terma jamoasi hujumchisi Krishtianu Ronaldu hamda uning sevgilisi Jorjina Rodriges o‘rtasida rasmiy nikoh shartnomasi imzolandi. Bu haqda Marca nashri xabar bermoqda.

Manbaga ko‘ra, mazkur hujjat katta moliyaviy majburiyatlarni o‘z ichiga oladi. Agar juftlik ajrashadigan bo‘lsa, Ronaldu yuz millionlab dollar sarflashiga to‘g‘ri kelishi mumkin. Shartnomada nafaqat har oylik to‘lovlar, balki bir martalik yirik summalar va katta miqdordagi bonuslar ham belgilangan.

Shartnomaning asosiy bandlari quyidagicha:

- Jorjinaga har oyda 114 ming AQSH dollari miqdorida to‘lov amalga oshiriladi;

- 5,6 million dollargacha bo‘lgan qiymatdagi ko‘chmas mulkka egalik huquqi beriladi;

- Ajrashish holatida Jorjinaga har oyda 110 ming dollar miqdorida “pensiya” to‘lanadi;

- Farzandlar uchun har oyda 500 ming dollar miqdorida aliment ajratiladi;

- Qo‘shimcha bonus sifatida yiliga 2 million dollar, ikki dona qimmatbaho avtomobil hamda aviaparvozlar bilan bog‘liq imtiyozlar taqdim etiladi;

- Ajrashish yuz bergan taqdirda, 50 million dollar miqdoridagi bir martalik to‘lov amalga oshiriladi.

Forbes nashri hisob-kitoblariga ko‘ra, Krishtianu Ronalduning boyligi taxminan 671 million dollar deb baholanmoqda. U ushbu shartnomani imzolash orqali nafaqat o‘z moliyaviy aktivlarini himoya qilish, balki Jorjina Rodriges va farzandlarining kelajagini ham kafolatlashni maqsad qilgan.