Ispaniyaning "Malyorka" klubi o‘z futbolchisi Daniel Rodrigesdan sardorlik bog‘ichini olib qo‘ydi, shuningdek, 10 kunlik muddatga mashg‘ulotlar va o‘yinlarda ishtirok etish imkoniyatidan mahrum qildi. Bu haqda AS internet nashri xabar bermoqda.
Rodrigesning jazolanishiga uning "Real"ga qarshi o‘yindan keyin ijtimoiy tarmoqlarda yozgan postlari sabab bo‘ldi, unda u "ishga hurmat" yo‘qligini aytib, norozilik bildirdi va farzandlari otasini maydonda ko‘rmaganidan shikoyat qildi.
Oradan biroz vaqt o‘tib, Rodriges jamoa bosh murabbiyi va klubning yangi a’zolaridan biri haqida yana bir post joyladi. Natijada "Malyorka" sport direktori jamoa murabbiyini himoya qildi va 2 kundan so‘ng 2019 yildan beri jamoada o‘ynayotgan futbolchi jazolandi.
