"Manchester Siti"ning sobiq futbolchisi, hozirda Saudiya Arabistonining "Al-Ahli" klubida to‘p tepayotgan Riyod Mahrez Xosep Gvardiola haqidagi fikrlari bilan o‘rtoqlashdi.
Jazoirlik futbolchi 2018-2023 yillarda ispaniyalik murabbiy qo‘l ostida to‘p surgan, shundan so‘ng "shaharliklar" safini tark etib, Saudiya Arabistoniga ko‘chib o‘tgandi.
"Gvardiolani eng yaxshi murabbiy deb bilaman, u menga yangi marralarni zabt etishda yordam berdi. Odamlar uning qanchalik yaxshi ekanligini tasavvur qila olmaydilar. Ba’zida bizda kelishmovchiliklar va janjallar bo‘lib turardi, lekin men har doim uning tanloviga hurmat bilan qarardim, hatto ko‘proq o‘ynashni xohlab, xafa bo‘lsam ham. U shunchaki murabbiy sifatida aql bovar qilmas, taktik jihatdan aql bovar qilmas," - deya Mahrezning so‘zlarini keltiradi City Report.
