«Manchester Siti»ning xorvatiyalik futbolchisi Mateo Kovachich AQSH ochiq chempionati — 2025 (US Open) doirasida serbiyalik tennischi Novak Jokovich bilan uchrashdi.
Sportchilar uchrashuvi Nyu-York shahridagi Artur Esh stadionining tribuna osti hududida bo‘lib o‘tdi. Kovachich Jokovichga o‘zining imzosi tushirilgan nomli futbolkasini sovg‘a qildi.

Iyul oyida Jokovich, Kovachich, shuningdek «Real» afsonasi, hozirda «Milan»da to‘p surib kelayotgan Luka Modrich va UYEFA prezidenti Aleksander Cheferin Xorvatiyada dam olish paytida uchrashishgan edi. Ular Adriatika dengizidagi Korchula arxipelagiga kiruvchi Vela-Stupa oroliga tashrif buyurishgan.
Bugun, 5 sentyabr kuni, AQSH ochiq chempionati — 2025 yarim finalida Jokovich jahon reytingida ikkinchi o‘rinni egallab turgan ispan Karlos Alkarasga qarshi bahs olib boradi. Uchrashuv 00:00 da start olishi rejalashtirilgan.













