CAFA musobaqasining 3-turida O‘zbekiston va Qirg‘iziston terma jamoalari o‘rtasidagi uchrashuvda “Andijon” darvozaboni Erjan Tokotayev o‘yinning ikkinchi bo‘lim boshlarida boshidan jarohat olgani bois majburiy o‘zgarish sababli maydonni tark etgandi.
“Andijon” matbuot xizmati Erjan bilan bog‘landi.
- Erjan, sog‘ligingiz yaxshimi? O‘zbekistonga qarshi o‘yinda jarohat oldingiz. Hozir holatingiz qanday?
- Katta rahmat. Hozirgi paytda o‘zimni ancha yaxshi his qilyapman. Tahlil natijalaridan so‘ng shifokorlar o‘zimni zo‘riqmay turishimni va tanamga dam berishim kerakligini tavsiya berishdi. Shishish qaytishi uchun biroz vaqt kerak. Shundan so‘ng mashg‘ulotlarga qaytishim mumkin.
- Umuman, terma jamoamizga qarshi uchrashuv sizda qanaqa taassurot qoldirdi?
- O‘zbekiston bilan o‘yin haqida aytadigan bo‘lsam, yomon boshlamagandik. Aytishim mumkinki, raqib birinchi taymda faqatgina birgina golli vaziyatni hisobga olmaganda deyarli xavfli vaziyatlarni yuzaga keltira olmadi. Ikkinchi bo‘limda esa deyarli o‘ynamadim. Ikkinchi bo‘limning dastlabki daqiqalarida to‘qnashuv yuz berdi va o‘yinni tark etishimga to‘g‘ri keldi.
- Ma’lumki, Turkmaniston terma jamoasining asosini “Arkadag” klubi futbolchilari tashkil qiladilar. Siz esa Qirg‘iziston termasi safida ularga qarshi o‘ynadingiz. “Andijon” OCHL 2 ning ilk turini Ashxobodda aynan “Arkadag”ga qarshi o‘tkazishini yaxshi bilasiz. Xo‘sh, turkman futbolchilari haqida nimalarni ayta olasiz?
- Tajribali, malakaga ega futbolchilari bor. Albatta, qanday o‘yin ko‘rsatishimiz o‘zimizga bog‘liq. Lekin yengil o‘yinlar bo‘lmaydi.
- Ayting-chi, “Arkadag” bilan uchrashuvda nimaga ko‘proq e’tibor qaratishimiz lozim? Masalan, ularni kuchli va kuchsiz taraflari nimada deb o‘ylaysiz?
- Mening fikrimcha, biz nisbatan yoshroq jamoamiz. O‘ylaymanki, yaxshi tempda o‘yin ko‘rsatadigan bo‘lsak, bu yaxshi natijani ham keltiradi.
- Andijonga qachon kelasiz? CAFA musobaqasidan keyin o‘zingizni qanday his qilyapsiz?
- Hozirgi paytda tinchgina va yuklamalarsiz dam olishim lozim. Tezroq safga qo‘shilishim uchun qo‘limdan kelgan barcha harakatni qilyapman.
