Qashqadaryo viloyati hokimi boshchiligidagi viloyat rahbarlari kecha Chempionlar Ligasi Elit musobaqasi starti oldidan “Nasaf” jamoasi bilan uchrashdi.

Viloyat hokimi Murotjon Azimov jamoaning nafaqat viloyat, balki butun O‘zbekiston sharafini himoya qiluvchi bayroqdor jamoa ekanligini ta’kidladi. U jamoa bu mavsumda Superligada chempionlikni saqlab qolish bilan birga, xalqaro maydonda ham munosib ishtirok etishi kerakligini bildirdi.

Jamoa bosh murabbiyi Ro‘ziqul Berdiyev yaratilgan shart-sharoitlar uchun minnatdorchilik izhor qilib, qo‘yilgan vazifalarni yuqori darajada bajarishga harakat qilishlarini aytdi. Klub prezidenti Shuxrat Aslanov jamoa oldida mas’uliyatli vazifalar turganini, lekin bu yo‘lda dadil qadam tashlash zarurligini ta’kidladi. So‘nggi yillarda “Nasaf”dan milliy va yoshlar terma jamoalariga munosib futbolchilar yetishirib chiqayotgani alohida e’tirof etilib, bu yo‘nalishni yanada rivojlantirish muhimligi qayd etildi.

Jamoa sardori Umarbek Eshmurodov va darvozabon Abduvohid Ne’matov viloyat rahbariyati va homiylarga jamoa nomidan minnatdorchilik bildirdi.

“Nasaf” futbol maktabi qoshida yangi maydonlar ochildi

Qashqadaryo viloyati hokimi Murotjon Azimov boshchiligidagi viloyat rahbarlari tashrifi chog‘ida “Nasaf” futbol maktabi qoshida yangi sun’iy qoplamali maydonlarning ochilish marosimi bo‘lib o‘tdi.

Tantanali marosimda “Nasaf” jamoasi a’zolari va futbol maktabining yosh tarbiyalanuvchilari ishtirok etdi. Viloyat hokimi, shuningdek, viloyat futbol assosiasiyasi prezidenti Murotjon Azimov yosh futbolchilarga omad tilab, ularni “Nasaf” jamoasi a’zolaridek muvaffaqiyatli bo‘lishga undadi.