Angliyaning “Manchester Siti” klubi o‘ng qanot himoyachilari — Mateus Nunyes va Riko Lyuisning o‘yinini yaqindan kuzatmoqda. Futbolchilar yanvar oyida ochiladigan transfer oynasiga qadar o‘z samaradorligini isbotlashi kerak bo‘ladi. Aks holda, ularning o‘rniga yangi himoyachi xarid qilinishi mumkin. Bu haqda Manchester Evening News nashri xabar berdi.

Manbaga ko‘ra, “shaharliklar” qishda yangi o‘ng qanot himoyachisini xarid qilishi ehtimoli yuqori. Sababi — klub rahbariyati Nunyesga ham, Lyuisga ham to‘liq ishonch bildirmayapti. “Manchester Siti”ning yangi mavsumdagi omadsiz starti jamoa rahbariyatini xavotirga solgan. Shu bois ular qishda yangi futbolchilarni xarid qilib, himoya chizig‘ini yanada kuchaytirmoqchi.

Ma’lumotlarga ko‘ra, “Manchester Siti” yozgi transfer oynasi vaqtida “Nyukasl Yunayted” futbolchisi Tino Livramentoni sotib olmoqchi bo‘lgan, biroq keyinchalik bu transferdan voz kechgan. Ammo himoyadagi muammolar bartaraf etilmasa, klub qishda Livramentoni xarid qilishga yana urinib ko‘rishi mumkin.

Ma’lumot o‘rnida, Angliya chempionatining 3-turidan keyin “Manchester Siti” 3 ochko jamg‘arib, turnir jadvalining 13-pog‘onasida joy olgan. “Shaharliklar” navbatdagi uchrashuvni 14 sentyabr kuni “Manchester Yunayted”ga qarshi o‘tkazadi.