Bir necha yil oldin "Bavariya" vinger Lamin Yamalni o‘z safiga qo‘shib olishga uringan edi. Bu haqda Bild nashriga tayanib Goal portali xabar bermoqda.
Manbaga ishonadigan bo‘lsak, 2022 yilda "Bavariya" vakillari hatto Yamalning sobiq agenti Ivan de la Penya bilan Madridda maxfiy uchrashuvlar o‘tkazgan. Myunxenliklarning rejasi quyidagicha edi: futbolchining oilasini Germaniyaga olib kelish, Laminning 16 yoshga to‘lishini kutish va taxminan 5 million yevro miqdoridagi tovon puli bilan ta’minlash.
Yevropaning qolgan qismi Yamalning iste’dodini anglab yetmaguncha, "Bavariya" ustunlikka ega deb hisoblangan. Biroq, kelishuv oxirgi bosqichda, yulduzli agent Jorje Mendesh ishga aralashganida barbod bo‘ldi. U Yamalning yangi agentiga aylandi va "Bavariya"ni futbolchini sotib olish umididan mahrum qildi. Keyinchalik "Barselona" Laminning asosiy tarkibga kirishini tezlashtirdi.
