Xans-Diter Flik o‘tgan haftada Lamin Yamalning jarohati haqida gapirgan va Ispaniya terma jamoasining harakatlaridan noroziligini bildirgandi. Flik Yamalning nega maydonda ko‘p vaqt o‘tkazganini tushunmayapti, chunki terma jamoada uning sog‘lig‘i bilan bog‘liq muammolar borligini bilishardi.

Ispaniyaning Sport nashri xabariga ko‘ra, "Barselona" va Ispaniya terma jamoasi tibbiy shtablari o‘zaro ma’lumot almashgan. Shunday qilib, milliy jamoa klubga Yamalning og‘riqli his-tuyg‘ulari, shuningdek, futbolchi mashg‘ulotlarni o‘tkazib yuborgani va noqulaylikni bartaraf etish uchun ukol olgani haqida xabar bergan.

Xabarlardan birida Ispaniya terma jamoasi vakillari safga qaytish-qaytmaslikni Yamalning o‘ziga havola qilishayotganini bildirgandi. Bundan "Barselona"ning ko‘ngli to‘lmadi. "Ko‘k-anorranglilar" qarorni hali jismoniy imkoniyatlari chegarasini to‘liq anglab yetmagan 18 yoshli futbolchi emas, balki tajribali shifokorlar qabul qilishi kerak, deb hisoblamoqda.