Madridning "Real" klubi darvozaboni Tibo Kurtua jamoaning hozirgi bosh murabbiyi Xabi Alonso qo‘l ostidagi o‘yini haqida fikr bildirdi.
"Qaymoqranglilar" Chempionlar ligasining seshanba kungi o‘yinida "Marsel" ustidan irodali g‘alabani (2:1) Kilian Mbappening penaltidan urgan ikki goli evaziga ilib ketdi. Maydon egalari o‘yinni 10 kishi bo‘lib yakunlashdi, ammo baribir o‘yin oxirida gol ura olishdi.
"Agar butun jamoa bilan himoyalanmasangiz, muammolar yuzaga kelishi mumkin. Murabbiy hamma himoyaga qaytishini diqqat bilan kuzatmoqda. Endi mutlaqo barcha - vingerlar, Mbappe, Gyuler, yarim himoyachilar to‘pni yo‘qotganidan keyin tezda himoyaga qaytishlari kerak," - dedi Kurtua o‘yindan keyingi intervyusida.













