Superliga 22-turidan o‘rin olgan “Xorazm” – “Qo‘qon-1912” uchrashuvidan so‘ng mehmonlar bosh murabbiyi Bahrom Haydarov o‘z fikrlarini bildirdi.

“Bugun olti ochkolik o‘yin edi. Chunki turnir jadvalida “Xorazm” va “Qo‘qon-1912” juda yaqin joylashgandi. Mezbonlar to‘pni nazorat qilishda yaxshi ko‘rsatkichga ega. Buni mavsum boshidan beri kuzatib kelyapmiz. Juda qiyin o‘yin bo‘ldi. “Xorazm”ni to‘pni ko‘proq nazorat qildi, biznikilar to‘psiz ko‘p harakat qilishiga to‘g‘ri keldi. Bu esa ancha kuch yo‘qotilishiga olib keldi. Yigitlarga rahmat, oxirigacha kurashdi. Durang har ikki jamoani ham qoniqtirmadi deb o‘ylayman. Chunki uch ochko bizga ham, raqibga ham kerak edi.

Mezbonlarda ham ko‘plab vaziyatlar bo‘ldi, lekin ulardan foydalana olmadi. Bizda ham qarshi hujum vaqtida gol urish uchun imkoniyat yuzaga keldi, afsuski, foydalana olmadik.

Shahzod Beshimov mashg‘ulotlar vaqtida jiddiy jarohat olgandi. Natijada jarrohlik amaliyotini boshdan kechirdi. Endilikda u mavsum yakuniga qadar jamoamizga yordam bera olmaydi. Umid qilamanki, kelasi yilda Shahzod yana futbolga qaytadi”, - dedi Haydarov o‘yindan keyingi matbuot anjumanida.