2025-yil 26 sentyabr kuni xokkey bo‘yicha O‘zbekiston Respublikasi ochiq chempionatining yangi mavsumi start oladi. Musobaqa xokkey bo‘yicha 10U, 12U va 14U yosh toifalaridagi o‘smir jamoalari o‘rtasida o‘tkaziladi. O‘yinlar mamlakatning bosh muz saroyi — "Humo Arena"da, shuningdek, Samarqand shahridagi "Family Park" muz maydonida bo‘lib o‘tadi.

2025–2026-yilgi mavsumda quyidagi jamoalar ishtirok etadi: "Humo Wings" (Toshkent), "Humo Sky" (Toshkent), "Snezjiy Bars" (Toshkent), "Sherdor" (Samarqand), "Tornado" (Shimkent), "SDYUSSH Binokor" (Toshkent), "Hockey Planet" (Toshkent), "Raximjan" (Olmaota), "Alma-Ata" (Olmaota).

O‘tgan mavsumda chempionat uch yosh toifasida — 9U, 12U va 15U bo‘lib o‘tgan edi. 9U kichik guruhida oltin medallarni "Humo-1" (Toshkent) jamoasi qo‘lga kiritgan. 12U toifasida chempionlik unvoniga "Humo Akademiyasi" (Toshkent) sazovor bo‘lgan. 15U katta yosh guruhida esa g‘oliblikni "Turan" (Shimkent) jamoasi qo‘lga kiritgan.

Chempionat yosh xokkeychilarning sport mahoratini rivojlantirishga xizmat qiladi. Bunday musobaqalar kelajak avlodi shakllanishi uchun poydevor bo‘lib, ular yurtimiz sharafini xalqaro maydonlarda himoya qiladigan sportchilarga aylanishiga yordam beradi.

Ochilish uchrashuvi 26 sentyabr kuni bo‘lib o‘tadi. 14U toifasidagi dastlabki bahsda kichik Humo Arenada "Humo Sky" (Toshkent) va "Alma-Ata" (Almata) jamoalari o‘zaro kuch sinashadi. Bellashuv soat 14:40 da start oladi.