Kecha qit’amizning yettita mamlakati sport majmualarda futzal bo‘yicha Osiyo kubogi-2026 saralash bahslari yakuniga yetdi. Keyingi yilning yanvar – fevral oylarida Indoneziya poytaxti Jakarta shahrida bo‘lib o‘tadigan qit’a chempionatining 16 ishtirokchisidan 13 tasining nomi aniqlik kiritildi.

Final raundiga tasodifiy jamoalar yo‘llanma olishgani yo‘q. Oldindan kutilgan, bashorat qilingan jamoalarni biz Osiyo kubogi-2026 musobaqasida ko‘ramiz. To‘g‘ri, saralash guruh bosqichi ayrim uchrashuvlarida kutilmagan natijalar qayd etildi. Biroq bu yakuniy natijaga – yo‘llanma taqsimotiga jiddiy ta’sir ko‘rsatmadi. Faqatgina YE guruhi mezbonlari – Xitoy terma jamoasining o‘z uyida uchinchi o‘rinni egallab, final bosqichiga chiqa olmaganligini qayd etish mumkin. Shunda ham, mazkur guruhda dastlabki ikki o‘rinni egallagan jamoalar (Vyetnam va Livan) ko‘p yillardan buyon Osiyoda yetakchi pog‘onalarda kelishyapganligini tan olish lozim.

Saralash guruhlarida Avstraliya, Tailand, Yaponiya, Vyetnam, Qirg‘iziston, Eron hamda Afg‘oniston terma jamoalari birinchi o‘rinni egallashdi. Shuningdek, guruhlarda ikkinchi pog‘onadan joy olgan — Kuvayt, Janubiy Koreya, O‘zbekiston, Tojikiston, Livan hamda Malayziya terma jamoalari ham final bosqichi yo‘llanmasini rasmiylashtirishdi. Bular qatoriga musobaqa mezbonlari – Indoneziya (saralash o‘yinlaridan ozod qilingan) va "D" guruhi (oktyabrm oyida bo‘lib o‘tadi) g‘olibi hamda ikkinchi o‘rin sohiblaridan yana bir jamoa qo‘shiladi. So‘nggi ishtirokchi Myanma yoxud "D" guruhida ikkinchi o‘rinni egallagan jamoa bo‘ladi.

Eslatib o‘tamiz, XVIII Osiyo kubogi final bosqichi 2026-yilning 27-yanvar – 7-fevral kunlari Indoneziya poytaxti Jakarta shahrida bo‘lib o‘tadi.