Yunon-rum kurashi bo‘yicha O‘zbekiston terma jamoasi so‘nggi jahon chempionatiga qadar 2001 yil dunyo birinchiligida oltin medalni qo‘lga kiritgan.
Unda Zagrebdagi chempionligi bilan barchaning olqishiga sazovor bo‘lgan 19 yoshli hamyurtimiz Aytjan Xalmaxanov hali dunyoga kelmagan edi.
– 24 yil kutilgan chempionlik Sizga nasib qildi. Musobaqadan keyingi hissiyotlar qanday?
– Mana shunday ahamiyatli oltin medalni qo‘lga kiritganimdan juda xursandman. Buni tasvirlash qiyin. Biz bu musobaqaga 1 yil qattiq tayyorlandik. Mehnatimiz samarasini ko‘rish nasib qildi. Afsuski, jamoamizdagi qolgan akalarimga ozgina omad yetishmadi. Bu bilan to‘xtab qolmaymiz. Keyingi safar ular ham chempion bo‘lib qaytishlariga ishonaman.
– Rustam Assakalov terma jamoada nimalarni o‘zgartirdi? Uning ishlash uslubi qanday?
– Murabbiyimiz mehnatkash, juda ham aqlli inson. Barchamizni o‘z farzandidek ko‘radi. Doim qo‘llab-quvvatlab, motivasiya berib keladi. Rustam aka 2024 yil oktyabr oyida murabbiylikka kelgan bo‘lsa, ortda qolgan 1 yil katta natijalar ko‘rsata oldik. Osiyo chempionatida umumjamoa hisobida ikkinchi, jahon chempionatida esa uchinchi bo‘ldik. Bunday natija hamma murabbiyning ham qo‘lidan kelmasdi.
– Afsuski, siz kurashadigan -63 kg Olimpiya vazn toifasi emas. Los-Anjeles-2028 Olimpiadasiga qaysi vaznda tayyorlanasiz?
– Ha, -63 kg Olimpiya vazni emas. Bo‘lajak Olimpiadaga -67 kg vazn toifasida tayyorgarlik ko‘raman. Tabiiy vaznim kattaroq bo‘lgani uchun -60 kgga vazn qaytara olmayman. Nasib bo‘lsa, murabbiylarim bilan Los-Anjelesdan ham oltin medal bilan qaytamiz.
– Ba’zi kurashchilarning omadi kelib, yoshligidagi kumiri bilan musobaqada to‘qnash kelib qoladi. Siz kumiringiz bilan hech to‘qnash kelganmisiz?
– Men havas qiladigan 2 kurashchi Qirg‘izistondan: Joloman Sharshenbekov va Akjol Mahmudov. Asosiy usulimni Sharshenbekovga havas qilib ishlaganman. U bilan tez orada to‘qnash kelib qolsak kerak. Bu kunni sabrsizlik bilan kutyapman. Mahmudovning kurashidan esa motivasiya olaman. Zagrebda finaldan oldin Akjol chempion bo‘lishimga ishonishini aytdi. Bu qo‘llov menga kuch berdi.
