"Liverpul" bosh murabbiyi Arne Slot APL 6-turidan o‘rin olgan "Kristal Pelas"ga (1:2) qarshi o‘yindan keyin o‘z fikrlarini bildirib o‘tdi.

"Birinchi bo‘lim juda qiyin kechdi. Raqib yaxshi o‘ynadi va 1:0 hisobida oldinga o‘tishga loyiq edi. Yaxshiyamki, biz faqat bitta to‘p o‘tkazdik. Ikkinchi bo‘limda esa aksincha bo‘ldi. Hisobni tenglashtirish uchun bizga vaqt kerak bo‘ldi. Ikkinchi standartdan keyin ular gol urib, g‘alaba qozonishdi.

Agar APLda kurashmoqchi bo‘lsang, standartlarda juda yaxshi muvozanat bo‘lishi kerak. O‘tgan mavsumda bu bizning kuchli tomonimiz edi. Bu mavsumda esa "Nyukasl"dan ikki marta va bu yerda ikki marta gol o‘tkazib yubordik. APLda standartlar tobora katta kuchga aylanib bormoqda," - dedi Slot.

"Liverpul" navbatdagi o‘yinini 30 sentyabr kuni Chempionlar ligasi doirasida safarda "Galatasaroy"ga qarshi o‘tkazadi.