Madridning “Real” klubi “Manchester Siti” yarim himoyachisi Rodriga jiddiy qiziqish bildirgan edi, ammo transfer amalga oshmasligi mumkin. El Nacional nashri ma’lumotlariga ko‘ra, “shaharliklar” ustozi Pep Gvardiola klub rahbariyatiga Rodri sotilmaydigan futbolchilar ro‘yxatida ekanligini aytgan.

“U biz uchun almashtirib bo‘lmas futbolchi”, deya fikr bildirgan Gvardiola.

Avvalroq OAVda “Real Madrid” 2026-yilda “Manchester Siti”dan Rodrini sotib olmoqchi ekanligi haqida xabarlar tarqalgan edi. Unga ko‘ra, “qirollik klubi” ispaniyalik tayanch yarim himoyachisi uchun 100 million yevro to‘lashga tayyor ekanligi xabar qilingandi.

Ma’lumot uchun, Rodri o‘tgan mavsumda jarohat tufayli uzoq vaqt maydonga tusha olmadi. U safga qaytgach, bor-yo‘g‘i 8 ta uchrashuvda ishtirok etib, 1 ta golli uzatma bilan kifoyalangan. Transfermarkt portali futbolchining bozor qiymatini 110 million yevro deb baholamoqda.

Eslatib o‘tamiz, Angliya Premyer Ligasining joriy mavsumi dastlabki olti turidan so‘ng “Manchester Siti” turnir jadvalida 10 ochko jamg‘argan holda 7-o‘rinni egallab turibdi. “Shaharliklar” navbatdagi tur doirasidagi bahsni 5 oktyabr kuni “Brentford”ga qarshi o‘tkazadi. Uchrashuv Toshkent vaqti bilan 20:30 da boshlanadi.